Por
Pepe de Rocaforte
Falábame de Lord Byron un amigo o outro día e
na conversa saíu o nome de Lady Hester Stanhope, a amada do xeneral John Moore,
de quen tratei aquí hai tres ou catro semanas. Lady Stanhope coñeceu a Byron
durante unha travesía de Malta a Atenas, en 1810, e o poeta non a impresionou
moito. “Vexo nel un home ben educado, coma tantos outros e, respecto á súa
poesía, compoñer versos é un traballo bastante doado”, opinou do vate con certa
displicencia a sobriña do político William Pitt.
Pero eso non vén agora ó caso. Dicíame o meu
amigo que cando escribín sobre a misteriosa dama visitante da tumba de Moore no
coruñés xardín de San Carlos, deixei de lado algunha información importante
sobre ela. Para remedialo un pouco, volvo sobre o tema.
Despois da morte do seu tío, o primeiro
ministro William Pitt, Hester Stanhope veu reducidos considerablemente os seus
ingresos. E se a esto se une a morte de Moore en 1808, co cal as posibilidades
matrimoniais (e a volta a unha aceptable situación económica) virábanse case
imposibles para ela, a súa situación, se non desoladora, fíxose preocupante.
Así as cousas, en 1810 acompañou a seu irmán
James, quen debía reincorporarse ó seu rexemento en España. Non sei se entón
aproveitou a ocasión para pasar pola Coruña e visitar a tumba do seu amado, ou
non o fixo. O que se sabe é que en Xibraltar despediuse de seu irmán e embarcou
camiño de Malta.
E aquí entra o detalle que, como ben di o meu
amigo, pasei por alto: mentres un poeta como Xosé María Castroviejo imaxinaba á
desconsolada amante de Moore “moribunda de melancolías”, disposta a “enterrar
nos desertos o seu amor desesperado e romántico”, Lady Stanhope iniciaba camiño
de Oriente unha relación amorosa con Michael Bruce, un mozo inglés once anos
máis novo ca ela e herdeiro dunha familia ben situada economicamente, co cal se
vían resoltos os seus problemas económicos.
O resto xa é outra historia, da que só
apuntarei que logo dunha reste de aventuras incribles polo Oriente Medio,
construíu un palacio na cima dun monte illado, nas proximidades de Djoun, en
Siria, onde chegou ser coñecida como “a raíña dos árabes”, e onde morrería en
1839.
Ningún comentario:
Publicar un comentario