Volvemos por
Portomarín, atraídos pola invitación do amigo Carlos a tomar as famosas
anguías, e facémolo nestes días de seca permanente, aproveitando para dar un
paseo por entre as vellas casas que permanecen asolagadas durante o resto do
ano, o antigo pobo asolagado cando Belesar está a tope.
Desta vez, o paseo fixémolo cruzando a antiga
ponte, que non adiviño a saber se é romana ou románica, e podemos volver ás pesqueiras ou caneiros de que xa temos falado neste caderno, pero véndoos un pouco máis de
cerca, máis en detalle, onde se aprecian mellor as chantas de xisto que forman
as pólas do funil en que rematan preto da pía, onde se poñen as redes ou nasas
para coller o peixe.
A pía ten forma
triangular, e como unha illa no medio dese funil que dixemos, para mellor cortar a corrente de auga, e sobre ela, acostuma a
haber un caseto ou palleira que serve de refuxio para o pescador.
Ningún comentario:
Publicar un comentario