xoves, 19 de maio de 2016

GALEGOS POLO MUNDO



Pepe de Rocaforte
            No pasado mes de febreiro puxen aquí un par de colaboracións (“Reis e vagamundos” e “Viaxeiros por África”) onde a raíz dun artigo de Miguel Anxo Murado sobre Alfonso Graña, un paisano natural de Avión, emigrante ó Brasil nos anos vinte do século pasado, comentaba o meu recordo borroso da historia doutro galego que nunha época anterior chegara a feiticeiro en certa tribo perdida da África Central. Daquela deille unhas voltas ós meus papeis en busca de máis información, pero non fun capaz de localizar nada sobre o particular, polo cal deixei a cousa no aire.
            Agora, case tres meses máis tarde, un amigo remíteme unha curiosa información que vén incidir un pouco sobre o mesmo tema. Trátase dun texto sobre Gonzalo de Vigo,  outro aventureiro galego do século XVI, enrolado na expedición marítima de Fernão de Magalhães  na primeira viaxe de circumnavegación do mundo. Para min é algo novo do que non tiña noticia, pero como, xa digo, vén tocar un asunto parecido, decidín volver sobre estes casos de galegos vagamundos ó longo da historia.

            Por aquelo de ter unha maior información sobre este mariñeiro vigués que entre 1520  e 1525 viviu entre os indíxenas da illa de Guam fun buscar máis datos onde, de entre as fontes que teño a man, me pareceu que podía atopar algunha ampliación sobre o caso, o libro “Primer viaje en torno del globo”, do veneciano Antonio Pigafetta. Pero na parte onde fala do paso polas illas de Rota e Guam, bautizadas por aqueles navegantes como “Illas dos Ladróns”, non atopei nin unha palabra sobre os fuxitivos que desertaran da nao capitana, a “Trinidad”.
            Non me foi posible acceder á Relación da Viaxe de García Jofre de Loaisa en 1525 escrita por Andrés de Urdaneta, de onde tomou os datos Eduardo Rollánd, pero confío plenamente na súa información, así que aquí a deixo por se alguén sinte curiosidade por estas historias.

Ningún comentario:

Publicar un comentario