Os Troteiros de Bande

Os Troteiros de Bande xa saen unha semana antes do Entroido a percorrer as aldeas do municipio invitando á xente a participar das celebracións, a entrar na primavera. Corren por camiños e corredoiras facendo soar as chocas da cintura e os cascabeis e axóuxeres das polainas.

            O traxe que visten é de aparencia simple, pero cargado de simbolismo, aínda que algúns elementos viñeron a substituír ós antigos. Así o mesmo gorro, que antes era de palla, agora confeccionase con telas ou incluso cartolinas, e adórnase con fotos recortadas da prensa de papel cuché, sempre con escenas da vida cotiá, pero o que non pode faltar é un espello cadrado na fronte, un espello que devolve a mirada, o facinium, o mal de ollo se alguén ten malas intencións con estes heraldos da primavera. E del colga un pano de gancho que tapa o rostro do troteiro.

            O traxe, sempre de cor branco, adórnase con fitas de cor, moi poucas, pero suficientes para darlle ese toque alegre que amosa a nova estación, pero sabemos que outrora, esas cintas, e sobre todo, o adorno que percorre o lateral da perna era unha edra atada.

            Como elemento defensivo, ademais do espello que devolve o aollamento, ármanse cun pao especialmente escollido, entre aqueles ós que unha edra se enrroscou, dándolle esa forma de espiral que o envolve.
E imos cara Cobres a coñecer as Madamas e Galáns