Consellos para unha embarazada (I)

       Das comidas e algunha consecuencias

Ó recibir a boa nova de que a nosa amiga Amparo espera ser nai moi pronto, permitímonos rebuscar na bibliografía máis á man, para aconsellarlle certas cousas que son imprescindibles para que o futuro ou futura veña con ben. E así, seguindo os consellos de Taboada Chivite, neste primeiro envite querémoslle recomendar que non coma lamprea, polbo ou a pasarela do cocho, tampouco será bo para ela os percebes, as fresas ou a raia para evitar que lle saian ó neno manchas no corpo que han de lembrar para o resto dos seus días aquilo que comeu súa nai, a maioría das veces por descoido ó tocarse cos dedos manchados do prebe nalgunha parte do corpo, e outras puntiños colorados que lembran os amorodos.

            Se come coello corre o perigo de que o neno saia co labio leporino, e se pasa por debaixo dunha corda que o neno naza coa lingua présa.

            E para rematar esta primeira entrada sobre o tema contareivos dun caso que coñecín, dun señor xa avó que conservaba nun lado da cara  unha mancha escura, e segundo contaba, viña de canso súa nai, grávida del, facendo o prebe da raia, mollou o dedo para probala e sen decatarse manchou a fazula nese mesmo sitio onde a el lle saíu a mancha.
      E celebra sempre a muller xestante os días non laborais